Lífið er búið að vera ansi rólegt síðastliðnar vikur. Baldur kom með fríðu föruneyti Íslendinga (Tommi, Bogi, Palli, Dagur, Bogga, Hersteinn, Kristján, Helga og Bjarni) til Tókíó en þau voru í tvær vikur en fóru af stað heim í morgun. Náðum að hittast og kíkja á ýmsa staði en ánægðastur er ég með djammið þar sem við náðum að fara á diskókvöld hjá Kento vini mínum, á after-hours barinn Chandelier Bar og svo síðast að borða Ichiran núðlur. Perfekto.
Ljósmyndasýningin hans Shibano sem ég var að DJa á var núna um seinustu helgi og gekk allt mjög vel. Var að spila einn og hálfan tíma á föstudeginum og þrjá tíma á laugardeginum. Hitti alls kyns skemmtilegt nýtt fólk, þar á meðal fólk frá tímaritinu Paper Sky en næsta tölublað verður víst með Íslands-þema. Þau tóku mynd af mér fyrir blaðið meðan ég var að DJa og sögðust ætla að skrifa litla klausu um mig og smella í blaðið einhvers staðar. Mjög töff.
Búinn að nýta tímann ágætlega og náði að klára rímixið fyrir Andy vin minn. Það geturðu fundið hér (beint dánlód). Originalinn geturðu heyrt á mæspeisinu hans. Annað sem ég náði að klára var dreifimiðinn fyrir sýninguna um höfund Nonna bókanna. Núna þarf ég bara að drulla mér að endurhanna mæspeisið mitt og setja upp nýja músík, uppfæra Ég elska Tokyo, undirbúa íslenskt tónlistarkvöld, klára Boogie Mixx II og að sortera ljósmyndasafnið.
Ég, Saho, Aiko og Hokushin kíktum til Atami í Shizuoka-héraði í stutta ferð núna síðustu helgi strax eftir DJ spilamennskuna á ljósmyndasýningunni. Gistum á hóteli við ströndina og fengum fínasta japanska mat með öllu tilheyrandi uppá herbergi. Svo var drukkið japanskt áfengi og talað á japönsku. Eftir það var það japanskt bað (eða onsen) og svo japanskur svefn (svona).
Daginn eftir kíktum við niður á strönd og skoðuðum okkur um í bænum. Gaman að sjá sjóinn aftur svona til hátíðarbrigða og sleikja sólina aðeins en voru búnir að vera hitabeltisstormar með þrumum og eldingum næstum upp á dag síðustu vikuna áður en við héldum út á land.
Ströndin í Atami.
Svona leit útsýnið út séð frá ströndinni. Minnti mig á eitthvað batterí á Mallorca eða Spáni. Þarna var fólk að æfa strandblak og að æfa sig í hafnarbolta, bara ekki á þessari mynd.
Á leiðinni uppá stöð römbuðum við upp á þessi ósmekklegheit, kaffihúsið Kuronbo. Yfirfært á Ísland væri þetta mjög svipað og að sjá Kaffi Niggari á Vík í Mýrdal.
Aðaltakmarkið með ferðinni var að kíkja í fuglagarðinn í Kakegawa sem var ekki langt frá Atami. Ekki mín hugmynd en reyndist vera ágætis hugmynd eftir allt saman. Röltum um garðinn og sáum alls kyns fugla eins og uglur, pelíkana, flamingóa og fleira. Átum soba núðlur og létum taka mynd af okkur með mörgæs. Ágætis eftirmiðdagur.
Kíkti í skólann í gær að skrifa undir fyrir styrkinn sem ég er á og rakst á þetta á lóðinni. Þetta eru nemendur að gera skúlptúra úr frauði eða einhverjum andskotanum. Tilgangurinn er Geisai 2008 sem er árleg uppskeruhátíð nemenda skólans.
Þessi sumo-kappi var ansi flottur.
Síðast en ekki síst er hér mynd af svona suður-amerískum panflautu-spilandi götulistamönnum sem ég rakst á í Ueno almenningsgarðinum á leið frá skólalóðinni. Svo fínir í Lakers litunum. Ég er farinn að kaupa plötur.
Allra seinast vill ég biðja um uppástungur að samkeppni á blogginu. Helst eitthvað sem er tiltölulega létt fyrir lesendur að framkvæma. Ætla að kaupa inn verðlaunin í dag.
Kominn tími á öppdeit af lífinu hérna í Japan. Þegar það er svona heitt (33°C+) að þá er lítill hvati að kíkja út og því hef ég eytt virku dögunum mikið heima að vinna í tölvunni. Er þessa dagana að gera dreifimiða fyrir sýningu um Jón Svensson (höfund Nonna og Manna bókanna) sem verður haldin í Tokyo í október. Svo er músíkín líka komin á smá skrið en meira um það aðeins neðar í færslunni.
Á laugardaginn héldum við heimilisfólkið dúndur-vel heppnað partí sem bara nokkurn veginn titilinn Íslenska niðurkælings-veislan (á japönsku 納涼アイスランド祭). Við keyptum inn íslenskt lambakjöt (sem var alveg cyber-ljúffengt) og elduðum rétti uppúr bókinni Delicious Iceland sem er í sjálfu sér ótrúlega fyndin bók með geðveikt erfiðum uppskriftum en við náðum að láta þetta allt ganga upp. Gestirnir voru um 15 talsins og almenn ánægja ríkti um veitingarnar og skemmtiatriðin.
Þetta fann ég í plötubúðinni Coconuts Disk í Ikebukuro. Erectro house er víst voða hart og stíft house, ekkert voða ólíkt boner house.
Eins og ég minntist á hér að ofan að þá er ég komin á smá skrið með músíkina. Fyrir utan það að vera stöðugt að vinna að því að klára nýtt boogie mix (vantar bara þrjú lög sem ég var að kaupa af netinu) að þá er ég líka að klára nokkur rímix fyrir vini. Eitt fyrir hann Andy og annað fyrir Marcellus sem að er prómóter/músíker hér í Tokyo sem ég kynntist fyrir nokkrum árum gegnum vinkonu mína. Svo var ég að starta mjög spennandi prójekti með öðrum vini mínum hér en meira um það síðar þegar lögin verða til.
Var að kaupa nýtt minniskort í myndavélina í gær. Alveg ótrúlegt hvað verðin eru fljót að lækka í raftækjahverfinu hér í borg. Fékk 4GB SDHC kort á sirka 1000 kr. Svo getur maður fengið 32GB minniskubb á sirka 5000 kall. Mikil snilld. Tilgangurinn með kaupunum er sá að ég ætla að byrja að taka allar myndirnar héðan í frá í RAW sem þýðir að myndavélin þjappar myndirnar ekki neitt (ss. setur þær ekki í JPG-snið). Hver mynd verður þá um 20 mb en það þýðir að maður getur prentað myndirnar sínar í ágætri stærð þegar maður lætur verða af því.
Síðast en ekki síst hefur verið mikið að gera í brúðkaupum uppá síðkastið. Mikið að gera þýðir semsagt að það eru búin að vera þrjú brúðkaup sem ég hef ýmist farið í eða sent vídjóskilaboð í. Myndin hér að ofan er úr brúðkaupsveislu hennar Röggu sem ég fór í um daginn. Veislan var mjög fín og það var gaman að hitta á Íslendingana á staðnum og spjalla. Meira svona.
Í seinustu viku fór ég í ferð með öllum útlendu nemunum í skólanum til Nikko sem er eins konar Hveragerði Japans. Nóg af jarðhita og heit böð og hótel út um allt. Þetta er ferð sem er farin einu sinni af ári og er niðurgreidd af skólanum og ríkinu. 2 dagar/1 nótt á 3000 jen. Ekki slæmt.
Við lögðum af stað snemma á þriðjudagsmorgni og fengum fínan túrgæd sem notaði fínustu og virðulegustu japönsku sem ég hef heyrt. Þéraði okkur í öll í klessu og notaði alls kyns formlegheit á japönsku sem maður heyrir mjög sjaldan.
Stoppuðum í hádegismat í Gyoza-mura sem er frægt fyrir gyoza en það eru eins konar "dumplings" sem eru kínverskir að uppruna...
...og líta svona út.
Næsta stopp var Edo Wonderland en það er skemmtigarður sem er byggður upp eins og þorp frá Edo tímabilinu (1603-1868) og þar af leiðandi klæðist allt staffið fötum frá þeim tíma. Þarna var eitthvað leikrit að byrja sem ég náði ekki almennilega að fylgjast með...
...en það endaði í slagsmálum. Sem að gellan í græna vann á mjög auðveldan hátt að er virtist.
Næst skoðuðum við Nikkō Tōshō-gū hofið. Þar er sagt að Shogun-inn Tokugawa Ieyasu sé grafinn en samkvæmt fararstjóranum okkar er það ekkert víst því að hann lét gera margar grafir fyrir sig út um allt Japan. Ástæðan var víst sú að hann vildi ekki að einhver stæli beinunum sínum og gerði eitthvað ljótt við þau.
Eitt af því meira töff við þetta hof var að sjá "upprunalegu" Three Wise Monkeys, það er, þessir þrír apar sem að heyra ekkert illt, segja ekkert illt og sjá ekkert illt. Frekar töff.
Landslagið var mjög flott á leiðinni og það var gott að fá aðeins hvíld á steinsteypu-geðveikinni sem Tokyo er.
Við vorum um 8 tíma á leiðinni með öllum stoppum en þegar komið var á hótelið var slappað af í klukkutíma fyrir matinn. Fínasta onsen var á hótelinu sem ég kíkti alls þrisvar í og maturinn var einnig mjög góður. Eftir matinn var svo drukkið aðeins fram á nótt en ég var svo uppgefinn að ég lagðist uppí um miðnætti.
Vaknaði ótrúlega ferskur eftir bara sex tíma svefn og dagskráin hélt áfram. Kíktum í tvö söfn á leiðinni heim og lentum í Tokyo rétt fyrir kvöldmat.
---------------------------------
Brúðkaupið
Síðastliðinn sunnudag kíkti ég með Saho, Aiko og Ryano í brúðkaup vins hennar Saho. Vinur hennar var brúðguminn, gamall félagi hennar úr háskóla.
Svæðið sem brúðkaupið var haldið á var alveg tryllt. Lítill dalur með litla svefnkofa við árbakkann og samkomusvæði fyrir sirka hundrað manns. Athöfnin sjálf var haldin á samkomusvæðinu sem var rétt aftan við bláa tjaldið á myndinni.
Við mættum snemma á svæðið því að Saho og Aiko þurftu að setja upp græjurnar sínar því þær voru nefnilega með litlan konsert um kvöldið sem hljómsveitin Dagua. Litlar polaroid myndir voru teknar af öllum gestunum og hengt upp á töflu sem hér sést en ég er þarna í frönsku fánalitunum efst til vinstri.
Athöfnin sjálf byrjaði um eftirmiðdaginn þegar pabbi brúðarinnar skutlaði dótturinni í hendur brúðgumans.
Næsta skref var að lesa hjúskaparheitin og skrifa undir giftingarsamninginn.
Þar á eftir var risastór tunna af sake borin fram og brúðhjónin brutu lokið af henni í sameiningu.
Eftir það fóru allir og fengu sér sake úr tunnunni.
Næst var "photo-op" þegar að brúðhjónin skáru brúðkaupstertuna..
..og þar á eftir skiptust brúðhjónin á að lemja sjóðandi heit hrísgrjón með sleggju til að búa til mochi sem er mjög hefðbundið japanskt sælgæti.
Eftir athöfnina hófst borðhaldið og allir slöppuðu af og byrjuðu að sötra á þessu gífurlega magni af alls kyns áfengi sem var á boðstólum. Þarna er samankomið mikið af Nerima genginu en á þessum tímapunkti voru allir með sett upp þessi gleraugu sem að gera það að verkum að þegar maður rýnir í ljós/eld að þá sjást hjörtu allt í kring.
Fólk fór að busla þegar leið á veisluna og nokkrum heppnum var fleygt í ánna með tilkomandi látum.
Hljómsveitin Dagua steig svo á stokk og flutti rétt undir hálftíma af splúnkunýju efni. Setti upp litla klippu af þeim frá spilerí þeirra seinna um kvöldið en klippuna má finna hér.
Kveiktur var varðeldur og drykkjan hélt áfram. Prófessjonal barþjónn var fenginn til en hann blandaði alls kyns kokkteila í mannskapinn samhliða kampavíninu og hinu sullinu. Ég hélt mig við bjórinn sem betur fer.
Ég tók það að mér að DJa um kvöldið og spilaði í sirka einn og hálfan tíma. Mikið af gestunum hafði farið heim með seinustu lest en þó nokkrir urðu eftir og stemmningin var með eindæmum góð.
Allir fengu flugelda á einhverju stigi málsins og kveikt var í innibombum sem skutu upp skrauti yfir svæðið.
Kallinn!
Kvöldið varð skemmmtilegra og skemmtilegra og undir lokin hópuðust allir við varðeldinn og það var matreitt yakisoba og þvílíkt magn af kjöti í lýðinn sem var eftir. Eitthvað um 2-3 fór maður svo í bælið en það gistu allir í litlum skálum sem voru á víð og dreif í kringum ánna.
Fór að sjá Soil & PIMP Sessions í seinustu viku en þeir voru að spila í Shibuya AX sem er ansi stór tónleikastaður í miðbæ Tokyo. Tónleikarnir voru mjög góðir, gömlu slagararnir voru á sínum stað en þeir spiluðu einnig mikið af nýju plötunni sem var gaman að heyra "live" í fyrsta sinn. Náði rétt svo að taka örfáar myndir því gæslan var alveg ótrúlega ströng. Tveim mínútum eftir að ég hafði tekið örfáar myndir kom útsendari staðarins að leita mig uppi. Þegar hann kom upp að mér sá hann að ég var útlendingur og gerði því bara með handabendingum "myndavél" og "bannað". Fjúff.
Eins og ég hef minnst á áður er eitt af verkefnunum í skólanum að vera með útvarp fyrir börn innflytjenda. Annar liður þessa verkefnis er að kíkja í heimsókn í skólana og vera með vinnusmiðjur þar sem við tökum upp stuttar myndir/kynningar á vídjó með börnunum. Nú þegar erum við búin að fara í tvo skóla, annars vegar fyrir börn brasilískra innflytjenda og hins vegar fyrir börn norður-kóreskra innflytjenda. Báðar ferðirnar gengu mjög vel en ég er búinn að skella upp tveimur myndagalleríum með myndum frá ferðunum en þau sjást hér og hér.
Fór til Sendai yfir helgina með kennaranum og samnemendum á symposium-ið/ráðstefnuna Cultural Typhoon. Þar hittust alls kyns fólk úr fræðigeiranum og listamenn til að taka þátt í vinnusmiðjum og málstofum ýmis konar. Við nemendurnir frá skólanum okkar vorum með "media art" listaverk til sýnis og héldum kynningar á rannsóknarverkefnunum okkar. Kynningin mín gekk ágætlega og ég fékk haug af spurningum sem ég blessunarlega gat svarað. Athyglisverðasta sem ég sá var pallborðsumræðurnar með anarkistanum Andrej Grubacic og svo ótrúlega súr málstofa þar sem að fjórir póst-módernistar kepptust í að vera sem mest póst-módernískastir. Hátindi þeirrar umræðu var svo náð þegar að talið fór að berast í "engla" og hvernig við værum öll englar. Frábært.
Í Sendai hitti ég á snillinginn hann Sato en honum kynntist ég fyrir löngu síðan þegar hann heimsótti Ísland. Hann var einn af mínum fyrstu japönsku vinum og er hiklaust einn af fyndnari Japönum sem ég þekki. Þegar við vorum að rölta um bæinn rákumst við á þetta skilti sem sést á myndinni en það er fyrir hip-hop fatabúðina Sperm. Við fórum inn og þetta var bara ósköp eðlileg búð með enga brund-referensa nema bara í nafni búðarinnar. Veit ekki alveg hvort ég varð fyrir vonbrigðum eða ekki.
Ég er búinn að ákveða þemað og velja myndir fyrir tilvonandi ljósmyndasýningu sem mig langar að halda. Fór í gegnum allar myndirnar mínar af Íslandi frá nóvember 2006 til mars 2008 og valdi út um 30 myndir. Planið er að hafa (á víxl) myndir af fólki á djamminu (já, þú ert kannski á einni af myndunum) og svo af umhverfinu í Reykjavík. Held að þetta geti komið mjög vel út. Næsta verk er að prenta út myndirnar og búa til möppu til að sýna kaffihúsa/gallerí eigendum. Stefnan er svo að hafa sýninguna í október/nóvember.
Sumarfríið er byrjað í skólanum og helst það út september. Ástæða fyrir svona löngu sumarfríi er víst sú að því þetta er listaháskóli er svo mikið af prófum sem taka upp mikinn tíma, s.s. próf á ýmis hljóðfæri. Ég verð hins vegar ekki alveg eirðarlaus því út júlí mun ég halda áfram að lesa og að taka þátt í útvarps-verkefninu. Framundan er svo nóg að gera, gæti farið að vinna smá við þýðingar og svo ætla ég að fara á fullt með músíkína/mixteip-framleiðslu núna á næstunni. Svo lítur út fyrir að ég verði að plötusnúðast í ekki einu heldur tveimur brúðkaupum í sumar (þremur ef ég get DJast gegnum ADSL í brúðkaupi Steins og Áróru).
Talandi um músík, tjekkið á nýju MP3 Vikunnar sem er cyber-ljúft soul lag með hljómsveitinni Side Effect sem er búið að vera í miklu uppáhaldi síðustu daga. Smellið á hnappinn í slánni hægra megin til að hlusta.
